余文樂今日俾《蘋果》獨家爆秘撻台灣「皮帶大王」索千金王棠云(Sarah)，有指阿樂早排到台灣拍電影《春嬌救志明》，認識做model嘅有米千金Sarah，兩人一撻即着，阿樂頻頻飛台北蜜會佳人，兩人跟朋友聚會時更黐頭芒影相，噚日《蘋果》向阿樂求證係咪拍拖？佢就例牌否認，仲話兩個只係朋友。(新聞連結： http://bit.ly/2h26v71 )

不過，今日讀者凌先生透過「爆相爆片」分享阿樂人肉速遞到台北，半夜三更陪Sarah去食麵嘅相片，有圖有真相。凌先生表示：「12月4日凌晨3點半，朋友喺林東芳牛肉麵見到余文樂同呢位皮帶千金，佢哋一行四人，可能喺公眾地方，余文樂玩得好小心，同皮帶千金冇親暱表現，不過佢飲到醉晒。」

相片所見，着灰色衛衣嘅阿樂雙眼緊閉，一面迷樣真係好似有醉意噃，阿樂坐到大腿緊貼、小腿分開，坐姿一啲都似平時型開嘅佢。至於Sarah就同佢並排而坐，不過因為拍攝角度問題，Sarah被坐對面嘅女友人遮住，只影到佢嘅膊頭。而另一張相阿樂行開去洗手間，坐對面嘅女友人剛好企起身，清楚睇到長髮披肩嘅Sarah真身，用手輕托面嘅佢有啲皺眉，專心聽對面友人說話。

自從3年前同吳雨霏分手後，余文樂先後跟劉羽琦、周冬雨、模特兒Angel Chu傳緋聞，今次被讀者連環踢爆同Sarah嘅戀情，唔知佢幾時肯公開認愛呢！