李八方online︱民間自救 油尖旺區會推草擬抗辯書服務 助限聚令無辜中招者
蘋果日報 2020/09/22 16:50
李八方online余德寶限聚令
疫情似乎一日比一日好轉，不過政府就無限延長限聚令，今日（22日）就宣佈延長到10月1日中秋節。限聚令延長多一日，市民就多一日機會誤墮法網，因為警方濫發告票，成日將互不相識嘅市民拉埋一邊，就話佢哋違反限聚令，即時票控。有見及此，油尖旺民主派區議員就推出咗「草擬抗辯書」服務，協助無辜嘅小市民。
油尖旺區議會副主席公民黨余德寶喺fb出post話，律師建議市民收到限聚令告票後，可以考慮向警方出抗辯信，講明自己唔係聚集嘅原因，譬如出街食飯、買嘢等，同埋提交相關嘅單據證明。
余德寶話，警方聲稱收到抗辯信之後，有機會撤銷告票，亦有機會拒絕抗辯理由，拒絕嘅話就會再出信叫人交罰款，市民再拒絕交罰款，件案就安排法庭處理。為咗方便市民，佢哋提供WhatsApp熱線，供市民查詢，電話係5986 3569。
余德寶facebook圖片
余德寶仲話，今個月初警方無理地用限聚令票控街坊同記者，有位街坊只係因為鬼節而喺屋企樓下燒衣都無辜中招，所以一定抗辯，之前太古城一家三口喺母親節當日就喺太古城中心逛街，慘被票控，最終民主黨東區區議員趙家賢協助事主草擬抗辯信，要求警方撤控，最終成功抗辯。
警方身為執法人員，應清楚明白自己執行緊嘅法例內容，係好基本要求，家陣竟然掉返轉頭要區議員去幫市民做抗辯，呢個世界真係瘋癲。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！