每一個行業，都有一個出名麻煩、挑剔嘅客，得罪佢，好容易一身蟻。但如果你公司有一個人，連麻煩客都可以冧得貼貼服服，大佬都打得贏，應該冇咩嘢難到呢位神人。

「白松露之王」之稱、米芝蓮三星名廚Umberto Bombana，點只係飲食界神人，喺「打大佬冧客」方面都有一手！話說尋日Bombana喺旗艦餐廳8½ Otto e Mezzo BOMBANA，獲頒授意大利最高級別騎士勳章，咁開心當請嚟一班名人賀賀佢。

其中畢明都係座上客，佢仲喺現場直播訪問講到，同Bombana相識嘅淵源。話說好多年前，當時Bombana都仲喺另一間餐廳The Drawing Room做主廚，畢明就請朋友食飯，「兩個Course中間我等咗九個字，九個字！係咪嬲先！」畢明話，當時同朋友黑晒面咁，於是Bombana親自出嚟道歉，至於道歉方法，竟然係用白松露！「佢摩打手咁削削削，當時我哋仲係嬲嬲地，但佢唔停係咁削白松露，最後我話，『你咁樣，點嬲得你落？』」事後畢明更大讚Bombana，係一個好好嘅廚師，事後完全冇Hard feeling。

連一個出名咁有要求嘅人，Bombana都冧得掂，呢位廚神，點止煮嘢食叻，「打大佬冧客」仲叻！

蘋果財經，關心你飯碗
http://fb.com/appledailyatm