每逢中秋佳節，就梗係一家人坐埋食飯做節，早排上演爭母事件嘅鷹君羅氏家族，今年中秋有冇一家人坐埋食飯做節呢？八方聽聞羅旭瑞嗰邊有代羅老太發信，邀請所有仔女去沙田麗豪食晚飯，但據知羅嘉瑞嗰邊已覆咗唔會出席。
為乜羅嘉瑞嗰邊唔去呢？據聞過往幾次均有人代羅老太講話，而且內容與事實不符，擔心今次都有相同情況，最終令羅老太唔開心，所以覆信婉拒邀請，不過就唔知呢封信，羅老太有冇收到同睇到。
聽聞羅嘉瑞、羅康瑞同羅鷹瑞，其實已分別提早同羅老太慶祝中秋節，仲邀咗媽媽喺中秋節返屋企一齊過節，而且羅老太亦希望中秋之後可以返屋企，三兄弟都好掛念媽媽，希望媽媽身體健康，早日返屋企。

叫對方搵有說服力嘅理由

不過，羅老太嘅公關發言人就否認，嘉瑞、康瑞同鷹瑞三子之前有提早同老太過中秋，發言人話羅老太有邀請所有仔女同家人係中秋節一齊晚飯聚會，但羅嘉瑞、羅康瑞同羅鷹瑞並冇出席。
事實上佢哋並冇同羅老太提早慶祝中秋，過去40年，每逢周日羅家都會聚埋食晚飯，但過去一年半，羅老太多次親自叫羅嘉瑞、羅康瑞及羅鷹瑞三子參加家庭聚會同家庭會議，但係佢哋都冇嚟，又話佢哋唔嚟最好都搵啲有說服力嘅理由去解釋喎！