江美儀、汪詩詩、張美妮等今日喺中環出席家品活動，即場揀心水床單圖案。江美儀揀日本風床單，問佢係咪暗示男友鍾意睇日本AV，佢笑說： 「成日聽到yamede，講笑，男人會睇日本電影，好似《半澤直樹》，所以張床單好啱，幻想我係女主角。」

問有冇同男友一齊睇三仔、四仔？江美儀話： 「我熱情如火，睇埋唔得了。」 男友會唔會偷睇？佢話： 「偷睇唔緊要，睇完搵我解決，唔係搵第二個就冇得頂。」

講到台慶戰衣，江美儀表示要花心思搵啲有嘢睇、但又唔會騷太多嘅。佢仲話日前先至畀呂慧儀套衫嚇親，仲次次畀高海寧嚇親。江美儀笑言有叫佢收埋，但對方實在太勁(上圍)，根本收唔到。

咁會唔會因為有機會拎獎而性感啲？江美儀話：「年年都有機會，年年唔畀我，好困擾，著到咁靚去陪坐，今年會揀長袖，坐冷板凳好凍，未知有冇提名，我覺得我係大熱。」對於網民發起11.19熄電視，佢話：「全台藝員熄電視，個個返工。好難講支唔支持，自由決定，我返工一定熄，環保。」

汪詩詩啱啱喺紐約返港，有時差，今次佢係同老公甄子丹去當地領獎，最後一日行程去同荷李活電影製作人開會，老公仲揀緊劇本，之前已經推咗幾部。