早排自由黨榮譽主席田北俊同社福界前立法會議員張國柱合作，向受廢紙回收商停收廢紙影響公公婆婆派超市禮券，廣受外界好評，田少似乎對幫助弱勢社群越嚟越熱心，今次佢就玩Ice-cream challenge幫視障人士籌款，仲搵埋細佬田北辰一齊玩，但田少玩完之後竟然話，佢覺得田二少妒忌佢靚仔喎！

拋波甘比鍾國斌

點解田少咁講？首先要知Ice-cream challenge玩法。Ice-cream challenge要用一分鐘去體驗視障人士做一件簡單事情嘅難度，由兩個人蒙住雙眼，一隻手放身後，另一隻手攞起個甜筒，1分鐘餵對方食而不可以接觸對方身體任何部份，之後再搵3個人接力接受挑戰，而每人最少捐款港幣100蚊。
而田少今次響應薯片叔叔曾俊華為導盲犬慈善活動籌款號召，特別搵埋細佬返去佢哋細個讀書嘅男拔萃，一齊拍片玩，不過為乜田少會係fb話「田北辰妒忌我靚仔過佢」？原來田二少將支甜筒塞向田少塊面，搞到田少成面係雪糕，反而田少餵二少食甜筒餵得好準，不過做善事冇計啦！田少又搵大劉太太甘比、張寶華、黨友鍾國斌接力玩，仲叫大家一齊支持！有興趣市民可以去香港導盲犬協會網頁及導盲Guide dog嘅fb專頁參與及捐款。

李八方