火箭今季喺祟尚進攻嘅主帥迪安東尼（Mike D'Antoni）麾下如魚得水，雲集E哥頓（Eric Gordon）同賴恩安達臣（Ryan Anderson）等外圍炮手，加上夏登（James Harden）交出MVP級表現，目前站穩西岸「三哥」位。周五常規賽，佢哋作客公牛已經唔算手風順，但依然夠贏115:94，為迪帥帶嚟執教生涯500勝！

火箭雖然首節落後10分，但第2、3節竟然爆出69:30嘅分差，令賽事早早進入垃圾時間，全隊亦有5位球員得分雙位數。自1998年起出任NBA主帥、之前執教過金塊、太陽、紐約人、湖人嘅迪帥賽後：「我喺NBA都打滾咗好耐，執教過幾支好球隊，呢支火箭就係其中一支最佳球隊。」