地產多聲道:新仔連賣兩伙賺8.4萬

蘋果日報 2002/02/19 00:00


響提供新春賣樓優惠的刺激下,發展商農曆新年大致都有唔錯進帳,代理收入亦增加。
中原地產就有一個啱啱入行3個月嘅新人,響上個禮拜六一口氣做咗兩個逾千呎一手單位成交,分別係沙田碧濤花園同馬鞍山迎濤灣,4萬幾佣金收入,加上發展商華懋送出的3.7萬獎金,短時間有8.4萬,真和味。
過完農曆年幾日假後,發展商嘅新盤又開始出場,馬年大型新盤愉景灣海澄湖畔,發展商香港興業(480)今日邀請傳媒睇示範單位,兼公布開售詳情,現時樓市氣氛仍不俗,希望該盤能成為馬年紅盤。
另外,太平協和(438)今日就請傳媒食飯,席間自然會講講荃灣海天豪苑嘅最新銷售數字,同埋公司嘅地產發展情況。

中原加強一手代理
發展商馬年滿肚大計,地產代理又何嘗不是,蘭西聽中原地產陳永傑講,中記今年會做多啲一手代理,特別係上半年,作為龍頭大行之一都加強一手代理,睇嚟個一手市都係有排旺。舊年代理行之間響新樓地盤內時時搞到極重火藥味,唔知今年情況會唔會加劇。
蘭西