黃秋生、林嘉欣主演，其老公袁劍偉執導嘅電影《死因無可疑》，今日喺粉嶺進行開鏡拜神儀式，出席演員仲有陳家樂、湯怡、廖啟智、馮素波、Ben Sir（歐陽偉豪）、歐錦棠及鄧建明等，英皇老闆楊受成亦有出席。

黃秋生同林嘉欣今次喺戲中飾演夫妻，嘉欣會有老態嘅造型，所以早幾個月已盡量搞老自己，嘉欣話：「自己原先都滿頭白髮，今次為個角色留咗兩、三個月白髮。」嘉欣老公袁劍偉今次執導《死》片，嘉欣話畀老公糟質，嫌嘉欣唔夠老，唔畀佢搽潤手霜，又唔畀佢做facial，要求好高。

黃秋生話今次自己做一個傻嘅角色，對白唔多，一開始就被嘉欣打，嘉欣笑言：「場戲講我攞個袋打佢，點知我唔記得咗放咗個鋼水樽入袋，打到秋生個頭腫咗，劉青雲聽到之後問我點解咁醒目。」

秋生表示，今次飾演嘉欣嘅觀音兵，從小就鍾意對方，因為要入戲，所以每日都用十分鐘望住嘉欣，對於怕唔怕嘉欣老公嬲，秋生笑言：「我傻㗎嘛！咁咪望住囉，而且我冇乜對白，好易撈。」秋生指今次係懸疑驚慄片，予人有《人肉叉燒包》嘅感覺，故事與一宗案件有關。

精選娛聞，喺晒《娛果》
http://fb.com/appledailyent