奧斯卡影帝里安納度狄卡比奧（Leonardo DiCaprio）一向熱心公益，日前卻爆出佢旗下嘅基金捲入洗黑錢案。美國司法部上月提出訴訟，要求凍結一個馬來西亞基金嘅逾10億美元（約78億港元）資產，其中部份資金可能流入里安納度嘅慈善基金，不過提交嘅文件就冇提到里安納度全名，喺長達136頁嘅法律文件入內，只提過兩次荷李活男星嚟交待。

里安納度原定會為美國民主黨總統參選人希拉莉（Hillary Clinton）喺佢位於洛杉磯嘅寓所設宴籌款，但當日活動突然宣佈改由佢嘅鄰居、美國男歌手Justin Timberlake與謝茜嘉比爾（Jessica Biel）夫婦主持，有關方面即否認里安納度退出活動同剛爆出醜聞、怕影響選情有關，解釋里安納度正喺紐約忙緊一部有關氣候變化嘅紀錄片《The Turning Point》，以趕及喺9月舉行嘅多倫多電影節上映而分身不暇。