問肥B現況，佢話：「十年前喺蘭桂坊開舖頭仔，閒閒地一日有一萬銀生意，一個月就三十萬，賺到幾個錢。最衰就係九六年去咗買樓，九七年之後，生意就如王小二過年，年年衰啲，上個月只做得十萬銀生意，每日三千蚊多啲，非常難頂，只好死捱。」唉，買樓變成負累，蘭桂坊生意不景，要諗辦法噃。肥B話：「附近唔少舖頭執咗，執完又開番，正是一雞死一雞鳴，好想請你指點，香港幾時先可以見到光芒重現？」你問我，我問邊個？
肥B讀書時係醒目之人，做事亦能當機立斷，佢見勢色唔對叫一位小股東睇住舖頭，自己就去打工，為一間歐洲名牌代理商跑中國大陸，到上海北京開零售店，生意又如何呢？肥B話：「邊度有錢賺㗎，我哋樣樣報到足，數字完全透明，咪得個做字囉；但歐洲總部話中國市場好重要，蝕本都要喺中國開分店，惟有頂硬上。」講起嚟，肥B一位老友在珠三角開廠就賺到盤滿砵滿，皆因同地方官關係打得好，數字有得傾喎。