人民幣上周突然玩貶值，令市場嚇了一跳，事關內地經濟風光不再雖路人皆見，但一眾專家只係估阿爺繼續循降準及減息等貨幣政策手段救市，無諗過出到貶值呢一着。最離譜喺，人民銀行周二調低中間價近2%後，有官員放料話係一次性貶值，點知翌日人仔再低開1.6%，搞到人心惶惶，人仔離岸價當日跌到甩轆，阿爺轉頭又要入市托返，真係膠到無朋友。
人行副行長易綱禮拜四出嚟解畫，話人仔無貶值基礎，市場先定番啲，但無情嘅現實係，美元強勢下各國貨幣今年貶到飛起，但人仔兌美元今年（截至上周一）就紋風不動，家陣連人仔亦泥菩薩過江，意味滙市角力會越嚟越激烈。

人仔貶值 　歐元得米

市場擔心人仔加入貶值行列，啲錢會更加側埋美元嗰邊，聯儲局如果硬要9月加息，美元升勢必火上加油，對出口以至推動通脹都構成更大壓力。加上市場好擔心中國經濟下放緩同人仔貶值，都增加聯儲局延後至年底加息的可能，令美元上周明顯洩氣。美滙指數上周回吐1%，是6月初以來最差，彭博追蹤的16隻主要貨幣中，歐洲貨幣最醒神，瑞典克朗飆3%最標青，熱門貨幣中歐元升1.3%最得米，英鎊亦升1%。相反新興市場及商品貨幣就繼續受人仔貶值拖累，坡元、韓圜、澳紐元都跌逾1%。

奇兵
本欄逢周一刊出