韓國女歌手IU噚晚於香港會展舉行演唱會，IU除咗又唱又跳近三小時外，更狂講廣東話，又大唱廣東話《囍帖街》及《喜歡你》，最後更安哥三次，完全唔捨得結束個騷，睇得出IU真係好鍾意港迷。

IU除咗大唱《Twenty Three》、《Good Day》、《YOU & I》外，又先後唱《囍帖街》及《喜歡你》，發音都幾標準。IU嘅演唱會冇繙譯，所以佢都盡量講多啲廣東話，例如「我唱得好唔好?」、「想成日見(大家)」、「我靚唔靚?」等，其實IU啲廣東話都講得唔錯，佢仲可以用廣東話講:「我廣東話唔好，點算?」及「廣東話真係好難學，廣東話係世界上最難學嘅。」

噚晚陳奐仁（Hanjin）以嘉賓身份現身，可惜佢未有跟IU有合作演出，不過IU就表示睇完Hanjin嘅演出之後心情超好。

而23歲嘅IU表演2009年舊歌《Marshmallow》時笑言:「首歌係高中時嘅，當時太可愛，依家我已經有啲老。」

之後IU戴上聖誕帽頭飾唱歌，預早跟港迷慶祝聖誕，又話:「早一日嚟咗香港，睇咗夜景，食咗美食，雖然香港唔會落雪，不過聖誕氣氛好好，好鍾意香港。」勁冧香港嘅IU表示要去海外影相時，佢一定首選香港，而且承諾會成日嚟。IU更唔捨得完騷，安歌三次，特別為港迷演唱《The Red Shoes》、《Heart》等歌曲，又準備咗全用廣東話講嘅感謝短片，坦言因為大家而眼濕濕，仲差啲想喊，最後唱足跟三小時先肯離開。

另外，IU亦趁喺香港期間去欣賞維港夜景，仲張照片放上Instagram，留言：「love HK」，似乎真係好鍾意香港。