【棟析先機】戰鬥力激增！北半球馬「威武再現」熟透 （陳華棟）
蘋果日報 2019/09/30 21:40
威武再現北半球馬陳華棟棟析先機
威武再現早前試泥閘，以輕鬆姿態跑第三。
跑咗一個月馬，剩低賀賢同霍利時兩個洋倉未開齋，話佢哋無心裝載又講唔上，但搏起嚟就係失運，好似賀賢出過26場拎到4亞4季成績，上名率唔低架，不過無運邊有計？
今次似乎以賀賢嗰手馬好啲，反觀霍利時只得「馬友冠」較似樣，但孭重磅加埋用郭能呢位老哥，睇嚟要贏馬開齋，都係等多幾日啦！
今期（10月1日）繼續介紹三匹心水，首先有第五場四班1400米「翡翠綠」，呢匹馬阿棟響佢上季第三場出賽時已經擺低啲真銀睇佢點跑。
老老實實，佢四班肯定超級，但心智睇嚟仲未成熟，每每出閘緩慢搞到好吃虧，但又次次追番段已經睇到佢潛質唔弱！
今季成熟大躍進，試閘有前有後衝勁強烈，用杜美爾配搭信得過，近況好嘅馬唔少，佢應該有啲分頭，值得跟番多少啊！
第六場三班1800米，「神亮金剛」上場初次跑快活谷亦係第一次配潘明輝，嗰場就輸咗跑第五，本來勝負乃兵家常事，但阿棟會用「混吉」嚟形容潘明輝嘅發揮，落山加速發力但又唔係一鼓作氣要領先入直路，結果直路就頂唔順對手嘅衝刺。
本來呢類跑法嘅馬一係贏咗一係大敗，但佢就中間落墨輸唔遠，咁就擺明佢有卡士，今次去番田草仲用得莫雷拉，戰意鮮明！復課狀態更上一層樓，臨場無意外的話，贏得！
第八場三班1200米，「威武再現」演出好穩定，跑過14場只係響新馬錦標嗰場輸進度而落後較遠，其餘13場都係響四馬位之內分勝負，馬就夠晒忠心。
上季只係贏一場係因為呢匹北半球馬未熟得晒，今季就唔同啦，狀態來得急戰鬥力激增。今場有「牛角仔」同「首飾大聖」兩大台柱在陣一定有分頭，內檔起步好跑，發揮得好就肯定坐位望贏。