今個星期五(16日)就係容祖兒37歲生日，噚日佢就約咗近300名fans喺沙田白石角BBQ場提早慶祝生日，呢個場係祖兒親自揀，佢話自己唔怕熱 ，不過當日氣溫高達33度，切蛋糕同燒豬時，個大蛋糕都溶晒咁滯，祖兒笑話簡直係火中送炭。之後祖兒同fans玩遊戲，當玩到「超級無敵大電視」時，祖兒覺得有啲中暑嘅感覺，作暈又作嘔，工作人員隨即好緊張，送佢入冷氣房休息。

因為祖兒覺得場地同慶祝方式都係自己揀，結果中暑要中途離場一陣好失禮，祖兒仲話：「當時突然聽到出面有人講『不如走啦！』，我即刻發揮小宇宙衝出去，因為未同fans大合照太可惜，我仲問佢哋使唔使逐個影合照，Fans話唔使，真係好錫我，好似媽咪上身咁，令我好感動。」

祖兒話媽咪當日雖然冇出現，但都有問佢正日想點慶祝：「我同媽咪講，冇乜特別節目，佢讚我大個女，唔需要大搞，開開心心咁過就得，不過身邊啲人問我係咪做咗中女唔想出街。」祖兒笑話被稱為中女已經好仁慈，自問年紀已係中女之上，不過自己仲有份少女好奇心。

講到生日願望，祖兒話好想一個人去旅行，可以每日同公司報告行縱，如東有人陪就會變得好依賴。問佢幾時要結婚，祖兒即笑話：「我有分數喇。」