香港電影導演會今晚舉行周年晚宴暨頒獎典禮，首先頒發新晉導演獎，成班新晉導演上台自我介紹，包括吳君如同李思捷等，到君如講嘢時，佢話：「其實我今年拍咗套《妖鈴鈴》，大陸票房都唔錯，仲有個評分網站，但評分唔高，佢話自己同劉偉強呻，點知劉偉強答佢：「冇事嘅，你拍啲冇人評分嘅嘢咪得囉！」問到對方拍咩好，仲笑言拍《建國大業》。

君如話：「所以我呢啲小學生導演就會一直咁樣打上去，其實我o依家都係一個百幾萬票房嘅導演嚟㗎！所以做人千祈唔好退休，退休就冇得玩㗎喇。」

最後由彭秀慧憑《29+1》奪獎，嗚咽住講多謝，佢話：「其實呢個對我嚟講好大件事，好緊張，我係一張白紙，今次《29+1》呢部電影我係好任性同大膽，亦好多謝蕭定一俾時間我做前期同後期，多謝啲演員，同新晉導演呢個獎好重，代表挑戰o依家先開始。」

精選娛聞，喺晒《娛果》
http://fb.com/appledailyent