曾經有過一段失敗婚姻嘅Julio@Soler，同富家千金、台中市長之女胡婷婷閃電結婚，又閃電離婚，外間似乎不感意外，一來有人話兩者「貧富懸殊」難以久合，亦有人話Julio異性緣不斷，難以專一。兩人婚後，Julio更試過被台灣傳媒影到同疑似混血索女背妻撐枱腳。

去年十一月底，即兩人婚後十個月左右，Julio被台灣傳媒影抱住BB、同一名混血女子進出酒店，但就不見胡婷婷同行。約半小時左右，兩人由酒店步出，Julio更好細心咁送埋女子同BB上車，事後即被瘋傳三人「關係特別」，最後驚動胡婷婷透過經理人解釋，指該女子係Julio嘅香港朋友，原本有相約要見面吃飯，因為婷婷感冒，臨時取消，故由Julio單刀上陣，胡婷婷仲話當日架的士仲係佢遙控幫手call，話成件事佢都完全知情。

胡婷婷同大佢7年嘅Julio相識143日就決定結婚，一心想做藝人嘅胡婷婷亦跟隔老公台北、香港兩地飛，去到邊都做連體嬰。即使Julio因為同前經理人「蜂鳥音樂」鬧出合約糾紛需與Dino@Soler作鉅額賠償、被法庭判賠違約金600萬元港幣，但因遲未賠款，前年被法院頒破產令，加上Julio離過婚，外間對胡志強肯俾個女下嫁Julio都嘖嘖稱奇，更有網民揶揄:「胡婷婷要幫他付違約金嗎？」但胡婷婷仍選擇力挺到底，男方於2013年12月31日第2次喺台中跨年晚會演出，仲對佢講:「胡婷婷我會永遠愛你！」估唔到事隔唔到1個月，就話分了。