新界人嘅守望相助真係唔到你唔佩服！超強颱風「山竹」上個月襲港，唔止市區出現大樹倒塌、街道損漽，鄉郊地區更加係暴雨成災，唔少人家園被毀。係呢個時候關注新界人權益嘅鄉議局當然唔會蹺埋雙手喇，唔夠一個月佢哋已經為今次風災總共籌得超過255萬元，而最大善長仁翁自然係主席發仔劉業強喇！佢個人就捐咗100萬元，差不多佔捐款一半，難怪政界成日話要坐穩鄉議局主席個位，真係少個錢都唔得。

西流江災民　每戶$5,000

鄉議局喺山竹襲港後，就即時成立「災後支援工作小組」兼為此籌款，除咗做主席嘅發仔開大水喉外，其他鄉紳父老、友好人士要搞好關係，自然要跟住捐，好似惠州社團聯合總會常務副主席王觀強捐出30萬元、港區全國人大代表顏寶鈴就捐咗20萬元、元朗區議會主席沈豪傑都捐咗成10萬籌得嘅款項，夾夾埋埋有多達255.5萬元，都唔係小數目！
工作小組之前就決定首先捐畀沙頭角西流江受影響嘅居民，等居民可以重建家園，每戶有5,000元，亦會出資幫8間損毀咗嘅寮屋重建。噚日就有多個居民去到鄉議局領取資助，八方明白鄉議局喺呢啲重要時刻咁「識做」，難怪新界人對鄉議局咁死心塌地，鄉議局同發仔日後有更多籌碼同政府講數！