日本丸龜製麵母公司Toridoll Holdings打算收購「譚仔雲南米線」，網民隨即熱烈討論譚仔還是三哥好食，中環人就諗緊，傳聞中10億元作價係貴還是平。望望上市嘅飲食股，新世界發展(017)主席鄭家純女婿龐建貽有份嘅Classified(8232)剛公佈首季業績，蝕713萬元，但公司股價竟然靜悄悄一路升，最新市值近16億元，難怪米線都賣10億喇。

Classified經營11間走時尚路線嘅西餐廳Classified ，仲有貴價The Pawn同中價The Fat Pig各一間。除咗龐建貽，股東仲有金山工業（040）主席羅仲榮兒子羅揚傑與朋友黃子超。

公司舊年7月喺創業板上市，配售價0.55元，今日收市報3.97元，累計升幅超過6倍，創仔股算係普通。呢隻股冇乜成交，經常全日冇成交，多數一百幾十萬成交一日，但佢股價就升得好靚呀，直情可以用穩步上揚去形容，慢慢升，上周四去過4蚊高位，推動市值越來越高，龐建貽等人佔19%，有3億元在手。

可惜Classified首季生意麻麻，收入跌近3成，兩間中高檔餐廳跌得幾甘，真係受到經濟疲弱影響。三位老闆似乎要諗計改善先至可以有「錢途」喎。

掌握財經生活資訊，即Like「蘋果ATM」fb專頁啦！
http://fb.com/appledailyatm