韓國人氣療癒系獨立樂團Standing Egg去年12月首度來港開騷，噚晚佢哋第二度喺九展舉行《STANDING EGG LIVE IN HONG KONG 2017》演唱會，並再次獲偶像劉德華送上花藍賀佢哋開騷，華仔仲大讚佢哋：「Good Voice，Good Show!」

而Standing Egg全晚唱出超過20首歌，仲不時發揮幽默本色，喺台上「搞爛gag」。YeSeul以《Rain drop,Tuk Tuk Tuk〉一曲打開序幕，又用廣東話同大家打招呼：「大家好，我哋係Standing Egg」，不過YeSeul就話港迷今日好靜，所以即時唱出輕快嘅歌冧粉絲。

緊住Egg2就唱出多齣韓劇嘅OST，又幽默話：「我平日都唔太鍾意睇電視劇，我只會睇自己有份唱嘅劇集，我發現好多劇集嘅男主角都很靚仔，而每次男主角出場就會播我唱嘅歌，我有啲擔心大家會唔會有錯覺，我個樣子同男主角一樣呢？」Egg2之後話要唱出最後一首歌，台下觀眾即時大叫唔好，Egg2就搞笑話：「其實當我唱完最後一首歌之後，大家就要嗌encore，我會扮唔知情，入去一陣又會出喛再唱歌給大家聽。」

而Egg2就指去年完騷後，有約港迷喺Instagram上「飲咖啡」，今年佢又約港迷喺Ig上一齊食雞蛋。最後Standing Egg坐言起行將真係食蛋，仲將照片放上網。