由崔丹尼爾、朴恩斌及李智雅主演嘅KBS新劇《今日的偵探》，講述捉鬼偵探李多日（崔丹尼爾飾）與熱血偵探助手鄭汝蔚（朴恩斌飾）捲入連串靈異案件，背後均與紅衣女鬼（李智雅飾）扯上關係，本月初首播後掀起驚慄劇熱潮，先係崔丹尼爾被賜死，加上李智雅嘅身份逐步揭開，令劇情更加緊張，港迷可於Viu煲劇平台逢周三、四追睇。

《今日的偵探》開播後與池晟及韓智敏主演嘅tvN劇集《認識的妻子》、徐玄及金正鉉主演嘅MBC劇集《時間》等劇對撼，雖然卡士唔算強勁，但勝在越煲越有戲味，突破一貫韓國偵探劇嘅框框。劇集目前播咗8集，剛剛係劇集嘅四分之一，但當中已經有唔少必睇位。首先，崔丹尼爾喺查案過程中遇害，透過能夠見到鬼嘅助手朴恩斌與舊拍檔、偵探所所長溝通，將食物擺成祭品後，崔丹尼爾終於食到嘢，令佢相當激動，場面爆笑，不過另一邊廂，所長因難以接受拍檔離世嘅事實而落淚，情節令觀眾動容。

其次，崔丹尼爾喺朴恩斌嘅幫助下，得知母親因為受到李智雅嘅威脅，其母親為咗崔丹尼爾而選擇割脈自殺，崔丹尼爾抱起母親屍體後忍唔住爆喊，場面相當催淚。而崔丹尼爾知道母親離世嘅真相後，即時爆發潛在力量，喺朴恩斌面前震碎屋內嘅玻璃，就連書櫃亦被震到塌咗落嚟，仲差啲整傷朴恩斌，好彩崔丹尼爾及時收掣，並喺千鈞一髮之際上演英雄救美，令劇迷期待二人之後嘅感情發展。

同時，《今日的偵探》亦早早解開紅衣女鬼李智雅嘅身份，原來喺李智雅12歲時，其失業父親打算同兩個囡一齊自殺，但李智雅僥倖逃過一劫，倒臥家中期間一直祈求有人嚟救佢，但因等得太耐而心生怨恨，所以決定會殺死嚟救自己嘅人。而一直利用幻覺、幻聽去唆擺他人自殺嘅李智雅，原來只係佢嘅靈魂，其肉體一直昏迷瞓喺醫院，李智雅更向崔丹尼爾宣戰：「我會令你變得非常孤獨，我會殺晒你所愛嘅人。」令劇情越發刺激緊張。

精選韓流，喺晒《娛果》
http://fb.com/appledailyent