「電訊」系今季憑一隻「電訊太子」連環揚威凱旋門，馬主張敬川及孖生兄長敬山，拉頭馬拉到手軟咁滯。呢日第四場「電訊太子」回配雷神又贏，近五場全跑田草千六，取得三冠兩亞全入Q，五歲馬無論用潘頓抑或雷神一樣識贏，而且三場頭馬都喺C加3跑道勝出，呢條欄位未輸過，仲率先成為葉廐今季首匹三捷馬，準到你唔信！張敬山、敬川日前專登約雷神飯局交流賽馬心得，據張敬山講「電訊太子」今場用番雷神，係張敬川提議，仲話自己會投注「電訊太子」、「感恩」、「準備就緒」及「招財快駒」四串六Q及位置Ｑ，結果「招財快駒」及「準備就緒」順序跑二、三，呢條纜中晒，位置Ｑ更收三瓣，睇嚟張氏兄弟對賽馬真係好有心得喎！
葉楚航就說「電訊太子」過往贏馬都是外面衝刺，今仗直路走中檔，是因為主要對手「招財快駒」飛出大外疊，令「電訊太子」有空位上前，慳了點腳程，他指「電訊太子」仍有進步餘地，希望再為馬主建功。