新界東今屆選情好激烈，就算一如重出江湖嘅鄭家富咁具知名度，都要勤落區力爭每一票。原來阿富最近拉票卻痛失心頭愛，日前喺沙田港鐵站外拉票時，唔少街坊拉住佢selfie打氣，佢當然無任歡迎，影相後卻發現，放喺路邊嘅水壺不翼而飛。唔見咗個水壺箒，有乜咁大不了？普通水壺就係囉，但阿富呢次唔見咗嗰個，係老婆送嘅愛心水壺，呢排陪住佢四出競選，有時飲一啖入面裝住嘅愛心湯，真係窩心到暈，所以唔見咗都好傷心，相信鄭太唔會扭佢耳仔啩？

環保至上唔派單張

講起上嚟阿富呢次復出，同08年嗰屆競選一樣，唔派單張，環保至上。阿富坦承唔派單張某程度有啲蝕底，但真正推動環保就無得計，佢話在任議員時曾經同當局反映，若候選人唔用政府提供嗰一次免費郵遞服務，係咪可以考慮將相關費用，實報實銷轉做選舉經費，「例如喺地鐵或巴士賣廣告，係咪可以claim番個上限？已經可以慳番好多紙！」佢話一旦成功重返議會，必定重提呢個建議，「因為環保唔係得個講字」。該區其他參選名單，請參閱本報立會選戰網站 http://hk.apple.nextmedia.com/legco2016/region 。