元華、曾江、范振鋒和李思欣噚晚出席奧海城舉行《唐人街探案2》優先場。元華同曾江都有份演出《唐人街探案2》，佢哋好多冇合作，對上一次係《警察故事3》，元華話：「今次冇對手戲，我開拳館教打拳，都係叫啲人去打，去到拍咗四日戲。」

曾江就係做唐人街教父，全程坐輪椅拍得好舒服，佢話最辛苦係坐飛機，曾江即刻投訴：「本來直飛紐約，但係飛機冇水要維修，停東京再停三藩市先去到紐約，搞到遲咗咗十個鐘到。」

李思欣開咗間娛樂公司做董事總經理，佢話名銜搞到佢好大壓力，問佢會唔會同老公夫妻檔，范振鋒耍手擰頭：「好怪嘅，自己做戲又唔係叻，之前都有人搵過我哋一齊做，不過我都已經推咗。自問自己又唔係做戲，佢又係學院派，我唔係好想吓吓畀佢教囉！大家都係分開好啲，可以叫搵我幫佢啲電影司儀，錢要收，但係可以收平啲！」

精選娛聞，喺晒《娛果》
http://fb.com/appledailyent