百仕達深圳「紅樹西岸」上年全部沽清,家陣有位於上海外灘同長寧區兩個project,無疑係超級靚嘢,但晒士唔大,再之後,亦無嘢跟尾。又大股東歐亞平出任由三馬牽頭的「眾安保險」掌舵之後,亦退任百仕達主席職。嚟緊百仕達三條出路:
(1)百仕達近幾年好似唔食人間煙火,再冇大搞作。若果真係無心戀戰,仍然有機會派大息,再拍戶好人家賣殼,多條出路,大、小股東仲開心。
(2)百仕達發憤,趁阿爺調控樓市之際出擊,等日後NAV同成績表,有再增長空間。又好保守當百仕達借貸70億銀,淨負債比率都係35%,而可動用現金,已經過百億銀,足夠集團整壇大龍鳳。
(3)百仕達keep住現狀,冇大改變。話晒,單係集團利息收入,都過1億銀,足夠cover所有高級管理層袍金加花紅(上年1,429萬銀)有凸。
三條出路,三分之二chance面,有機會係大龍鳳,值博。呢轉博百仕達,齋上返淨現金值1.1元,係要升80%,都肥仔啦。