江若琳於2007年出道，其後卻將重點放咗拍戲，今年係佢出道十周年，所以敲定下月9號同10號喺九龍灣國際展貿中心搞兩場《我只不過是江若琳演唱會》，呢10年間，江若琳嚐盡苦辣，佢同前經理人林小明嘅合約糾紛對簿公堂，所以佢仍然要撲水跑數支付龐大律師費，面對重重難關，卻令江若琳遇上「生煎包王子」蕭潤邦（Oscar），男友願為佢分擔一切。

籌備演唱會時，江若琳一直想做一首歌演唱會主題曲，希望憑歌寄意，寫出呢十年感受，填詞嘅人一定要好熟悉佢，咁先可以明白佢心中感受，正當江若琳好苦惱之際，白武士終於出現喇，佢就係男友Oscar。

其實Oscar未賣生煎包前，本身係男子組合Bliss嘅成員，都有填詞，Oscar即拍心口為女友做歌，仲碌盡人情卡，搵埋一班音樂人幫拖，包括有Mr嘅Dash同Swing嘅Jerald幫手作曲同編曲，跟住再搵商台DJ蘇耀宗(細So)幫手，兄弟四人幫負責做埋監製，新歌《我只不過是我》僅用咗一個月時間就起貨。

講到為女友度身訂造新歌Oscar接受《蘋果》訪問時話：「我想首歌表達Elanne（江若琳）由出道至今嗰份硬淨，做事決心，同佢嘅故事。」Oscar自爆花咗3日時間完成，佢笑言：「叫我放低麵粉棍，再揸番筆填詞，真係有啲難度，我通頂3日，頭兩日腦閉塞填唔出，第3日思緒出嚟。」Oscar話下月女友個騷，佢唔會上台：「我樂意做佢背後嘅小男人，佢喺上面搵食得啦，我唔上台，驚佢會激動會喊，唔排除尾場完騷，我衝上台強吻佢㗎。」

對於男友呢份心意，江若琳好感動咁話：「多謝佢搵班咁出色兄弟撐我，為我度身訂造咗一首屬於我嘅主題曲，佢同我填真係好適當人選，佢真係好了解我。」

後記：
講到為女友寫歌，Oscar話歌尾後寫到「錯過了如何，錯的不是錯，越戰越勇等於我，來日我定會比我更好過，錯過愛如何，來到今天讓我，重遇你命中的一個，能夠抱着你感覺最好過」特別送給摯愛。