炒家吼住海爾中建
今次停牌好似話係同海爾要爭做「大婆」有關,今次若果真係可以攞番個話事權嘅話,對隻股嘅前景好有幫助。有個朋友同伏勝講,有人喺星期二已經周圍同人講話海爾要做大股東,叫人有買趁手,但由於佢喺股壇嘅聲譽麻麻,所以無乜人理佢。有班炒友聽到隻1169停咗牌之後,就部署緊復牌時點炒隻股,話如果真係有海爾注資嘅話,絕對可以炒到去兩毫子。
有個朋友之前同伏勝話過要留意隻意科控股(943),雖然隻股上周一公布嘅業績差得好緊要,不過個朋友話間嘢就嚟會有新轉機,皆因公司喺度搞緊啲新嘢。隻股仔喺公布咗業績之後,個價果然升上嚟,而且成交額重多番啲。至於係啲乜?咁就真係唔知,伏勝之前都有聽過佢哋搵過本地部份做物流嘅公司,想搞國內物流業,不過最後都係傾唔埋。今次佢哋又話會有嘢搞,真係唔知係乜傢伙,至於買唔買,就要睇你信唔信佢哋啦。
伏勝