何淑萍話以前民主黨「砌」民生問題由下而上,街坊覺得幫到佢哋自然記住白鴿招牌,𠵱家只係由上而下做大路嘢,街坊冇晒feel,「要求加生果金、小班教學冇錯,但個個政黨都爭取,點解要投票畀民主黨?」
八方call另一黨員,佢顯得意興闌珊,話民主黨今次選舉動員力低,同年前「真兄弟」事件內訌有關,黨員向心力大減,冇心機助選。佢又指個別黨高層私心重,力撐自己嫡系參選,卻諸多阻撓其他新人,「揸住雞毛當令箭,抵佢落台。」
民主黨現屆領導層去年上場,八方知道有人等唔切出年底改選,近日竟然有黨員查詢今年係咪要改選。有黨員同八方講,由於出年立法會選舉,相信大部份人都唔想個黨大地震,「起義」機會唔大,但人心思變,黨內大佬要反省吓嘞。
泛民其他政團正檢視「傷勢」,社民連下月中搞兩日檢討營,初步總結認為下屆應行精兵制,今次候選人質素參差係致命傷;地區工作向來係公民黨弱項,叠埋心水應付出年選舉好過;民協03年7.1後改打政治牌,今鋪證明企錯邊,勢將回歸地區工作路線。