韓國男神金秀賢自從拍畢《製作人們》之後，一直處於半休息狀態，亦為10月開拍的電影《Real》做準備，不過佢拍戲之前自然都抽時間拍吓廣告吸吓金，今日韓國家電貴族品牌CUCKOO(福庫)就宣佈已經邀請咗金秀賢做佢哋嘅新代言人，而今日亦都公開咗金秀賢張靚仔廣告照，至於電視廣告就要到下個月先有得睇。

至於點解會搵金秀賢做代言人，廣告商就話：「金秀賢嘅形象幹練現代，同我哋嘅品牌定位相似，佢仲能夠為我哋開拓海外市場同埋帶來積極嘅影響。以後我哋將攜手金秀賢，積極拓展中國、馬來西亞等亞洲市場。」而金秀賢之後將會為品牌旗下嘅電飯煲、飲水機、微波爐、空氣清新機等眾多產品拍廣告。

另外，退伍後嘅宋仲基復出之後工作接唔停，現時除咗忙於拍攝同宋慧喬嘅新劇《太陽的後裔》外，近日佢又成為韓國頂尖專業戶外品牌KolonSports嘅新代言人，今日廣告商就宣佈已邀請宋仲基做代言人，並會於下半年拍攝一系列廣告，廣告於10月初就會公開。

此外，金秀賢所屬嘅Keyeast就宣佈與演員孫賢周簽約，即係話孫賢周將會同金秀賢做同門。