亞姐競選（港澳賽區）候選佳麗噚日喺荃灣悅來酒店，着三點式見傳媒。今年亞姐質素未及往年，騎呢醜態反而一籮籮，好似1號楊晴咪咪谷到上頸，5號萬嘉麗四肢瘦削凸胃腩，8號寇晨瑜胸下同大腿都有黑印，原來貪靚去脫癦，仲話：「初賽時脫嘅，醫生話唔會有疤痕。」但現場見都幾礙眼o架。不過佳麗中都有骨肉勻稱嘅，包括4號祁翼、10號何婭、12號閔蘭。10號何婭出場時扭吓扭吓咁衝向攝影區，要司儀喝止佢。

嚴抗紅外線偷拍

佳麗合照時，有陣大風刮起，背後佈景板幾乎吹起，嚇親啲佳麗。臭口芭比13號廖祉甯報稱上圍有34.5，但噚日睇真又唔似，佢又爆：「之前心臟病喺大腿大動脈位置做過小手術，怕大家猜測，話畀大家聽。」
之後臭口芭比無厘頭話：「上次病要簽紙又要籌錢，手術唔使錢，但有事要通波仔搭橋就要七萬蚊，好彩我都有積蓄，又有熱心朋友幫手。」佢又寸傳媒一時話佢身材平均，一時又話少少肥；佢起初話冇勁敵，但轉頭又話個個係競爭對手，睇嚟佢都好錯亂喎。
另外，亞視對郭晶晶俾人用紅外線偷拍相當關注，為免亞姐喺公眾場合着泳衣時，有人渾水摸魚扮記者用紅外線偷拍，大會將加強記者身份核實同審查，又會同泳衣供應商注意物料選用。至於亞姐將喺12月5號舉行，無綫台慶頒獎禮為避亞姐而改喺12月3號舉行。