作為領軍人物,38歲嘅施丹當然義不容辭,穿上佢喺法國着慣嘅10號球衣,兼做埋隊長出戰奧林比亞高斯。貴為皇馬顧問嘅施丹,體型同瀟灑腳法跟當打時期完全冇走樣,5分鐘一次個人突破,引球推進接近20碼兼連過兩關,只係最後一腳射斜。施丹今場就冇波入,為朗拿度施丹之友隊梅開二度嘅就係前葡萄牙國腳沙賓度;不過最後主隊入番兩粒,追成2:2和氣收場。
今場就吸引咗超過3萬球迷入座,以上場喺葡萄牙士砵亭嘅慈善賽都籌到50萬歐元,今次相信都會唔少。踢咗70分鐘就退下火線嘅施丹,賽後就好感激各方好友:「我首先多謝每位嚟到嘅球員、教練、工作人員同觀眾,我知希臘嘅經濟唔係太好,成功完成比賽唔係容易。」施丹「弗」爆登場,反而另一個牽頭人物朗拿度,就全場着住便服做觀眾;以巴甲啱啱收「咧」,踢緊哥連泰斯嘅大哨,冇理由唔夠狀態。唔通34歲嘅佢驚打出個大肚腩相形見拙?