日劇《交響情人夢》嘅33歲男星小出惠介，早前爆出性醜聞，佢被指喺大阪拍劇期間相約一名17歲女生夜蒲，女事主飲醉後被小出帶往酒店，禁室培慾共6小時，其間性行為共5次，有兩次更於體內射精。事件曝光後，女方隨即被起底，佢失婚兼係個單親媽咪，懷疑全心設計令小出惠介墮入桃色陷阱，仲曾經向小出惠介勒索500萬日圓（約35萬港元）。

小出惠介衰鹹濕搞到一身蟻，斷送其演藝事業，所屬嘅Amuse事務所已勒令佢無限期停工，可惜都係無補於事，Amuse唔止受事件拖累導致股價下跌，計算小出已接嘅日劇、電影及被廣告商提前解約等，事務所相信要賠天文數字嘅違約金，當中明石家森馬監製嘅Netflix自傳式新劇《Jimmy》原定7月7日起開播，小出喺劇中飾演明石家嘅年輕時代，噚日Netflix亦宣佈會換人重拍，呢套劇耗資高達3億日圓（2,121萬港元）嘅宣傳及製作費，勢令Amuse賠償金額再創新高，難怪日本傳媒形容呢次鬧出嘅性醜聞，為Amuse帶來創業以來最不利嘅衝擊。

Amuse創業將滿40周年，多年來都係演藝界龍頭，旗下有不少歌影視紅人，當中以桑田佳祐為首嘅Southern All Star、福山雅治更係公司王牌，Amuse社長畠中達郎近日出席股東大會時有就風波鞠躬道歉，又承認係公司「創業39年來最嚴重嘅不祥事」。

其實追塑至90年代，Amuse都遇過嚴峻考驗，印像最深有Beyond當年簽約Amuse進軍日本，於92年在日本出道後，黃家駒喺93年6月錄影富士電視台節目時，意外從裝置墮下被送院搶救，可惜數天後證實不治，家駒嘅離世都令到Amuse大傷元氣，分公司逐撤出香港，於五年前才再戰香港市場。