由王敏奕、馬志威、杜小喬等主演嘅校園青春喜劇《初戀日記：賤男蜜擾》將於3月初上映，日前佢哋喺中環接受訪問，對於該片講述中學時期嘅愛情故事，跟台灣電影《那些年，我們一起追的女孩》類同，馬志威話：「文化唔同，香港好少有呢類青春純愛校園片，反而台灣就多啲，導演想將呢部代表香港嘅青春校園片。」

談到初戀，王敏奕表示同大部份女仔一樣，好期待初戀發生，對方突然話嚟就嚟，真係被殺個措手不及，佢笑住話：「我嘅初戀發生喺中學，大家一齊互相吸引，互相鍾意，但細個又唔識珍惜對方，拍拖係自己感覺行先，變咗我好多要求要對方令到我開心。」杜小喬覺得初戀就如發夢一樣，佢話：「我初戀有8年嘅歷史，當時我想同呢個男仔一齊，千方百計都要同佢一齊，我唔會理自己啱定錯，總之佢留喺我身邊就夠。」

王敏奕同馬志威喺戲中飾演一對青梅竹馬嘅小情侶，可惜馬志威劈腿，王敏奕話：「我唔鍾意賤男，我覺得性格好重要，對家人、朋友要好好。」馬志威立即為自己辯護：「現實中，我冇試過劈腿，係非黑即白，完一段先開始另一段，唔好拖住人哋，亦好彩冇遇過劈腿嘅女仔，所以呢個角色好衰仔，好自私，唔理人哋感受。」提到佢哋有親熱戲，馬志威話：「唔係好激烈嘅kiss，我同佢都係專業演員，完全冇尷尬，事前都有溝通過。」

問到王敏奕有冇同男友曾國祥備案﹖佢話：「接咗呢個角色嘅時候，我要負責嘅就係要演好角色，然後同對手溝通，其他人就睇戲嘅時候細心欣賞再comment。」王敏奕指馬志威喺戲中有場裸跑戲，問到馬志威事前要唔要操fit﹖佢笑住話：「冇呀，都好突然o架，所以臨拍之前先操下，其實又唔係全裸，有條底褲，平時都有操，但可以更好啲囉，學生冇理由有6舊腹肌。」

拍攝呢部校園戲，王敏奕表示著起校服，勾起唔少校園回憶，佢話：「拍完都唔換衫住，食埋個飯先，好似放小息咁，同埋我哋喺一間佛教學校拍攝，喺特定時間會播佛經。」馬志威笑住話：「嗰日係佛誕，全日條聲都用唔到。」馬志威喺戲中上體育堂變成「睇肉堂」，佢笑住話：「細個都係咁樣，我細個係百厭，成日整蠱人，踢波嘅時候踢其他同學，喺課室入面睇vcd，之後又被人沒收，勾起番讀書嘅開心回憶，因為細個做嘢唔會負責任，諗到做咩就做咩。」

場地：Cookology

王敏奕
化妝：King Yip、Macy Chan @ Kings Makeup
髮型：Eas Fu
裙：iBLUES

馬志威
化妝：Kayte Fung([email protected])
髮型：Aki Choi @ The Attic

杜小喬
化妝：Anita Lo @ anitalomakeup
髮型：Kocher Yau @ Kanzaki Hair