馮仁昭四圍超:鬈毛王菲中環揀戰衣 - 馮仁昭

蘋果日報 2010/03/18 00:00


上月為中央台春節晚會復出獻唱《傳奇》一曲嘅天后王菲,日前先同老公李亞鵬及細女李嫣飛咗去雲南麗江度假,估唔到話咁快王菲已經度完假,仲即刻飛咗嚟香港,據知今次阿菲主要係傾10月北京同上海演唱會事宜,當然都順道為個唱同自己添置新裝。
開金口心情好
密鑼緊鼓籌備復出嘅王菲噚日相約友人到中環一帶shopping,電咗個新髮型嘅阿菲穿上全黑色服裝,仲孭咗個價值逾萬元嘅GoyardToteBag,型爆過人。阿菲喺女性友人陪同下先到Joyce購物,佢仲獲sales熱情招待,不過似乎冇乜心水,而且店外又有大批記者採訪,所以佢即時入到店內隱蔽處再慢慢逛,喺Joyce內逛足近兩小時,阿菲先聯同一早喺店內等候佢嘅化妝師阿Zing同造型師兼設計師TitiKwan,一行四人離開Joyce並轉戰附近嘅時裝店。
平日cool爆嘅阿菲噚日心情大好,一向少開金口嘅佢話家籌備緊北京個唱,至於會唔會喺開個唱前出隻廣東大碟,阿菲就笑笑口話:「暫時唔會住。」有指大女竇靖童將會獨自到上海升學時,阿菲即時面色一沉未有回答。及後佢哋繼續行街街,不過阿菲對於記者之後嘅提問就只笑不答。
empty
將會喺10月舉行復出演唱會嘅王菲,相信嚟香港係為個唱添置新裝。
今次留港兩日
阿菲經理人陳家瑛噚日接受訪問時就透露今次阿菲嚟香港純粹shopping,佢話:「阿菲同朋友見吓面,係私務。」雖然陳奕迅演唱會快將開鑼,但陳家瑛就話阿菲只會留港兩天,所以捧唔到場。