當年今日
關於我們

  趕入行會寶哥哥棄英籍唔出奇 - 李八方

蘋果日報 2005/09/26 00:00


煲呔今次能老董之不能,帶五十九隻立法會大馬騮過深圳河。呢個旅行團,主角梗係民主派,大家密切注意佢哋同廣東省省委書記張德江交手會唔會有火花,果然老張不離老共本質,觸及大原則如六四問題,一撻就着,扮晒立場堅定咁強調「話不投機」。
冇錯!老張只係地方官,但佢亦係中央政治局成員,而且有後台㗎!因為北訪珠三角呢場戲做到咁大,唔係佢可以自由發揮咁簡單,唔多唔少都可以睇到中央嘅手影,應酬大家遊山玩水、飲飲食食有乜所謂,但講到六四、政改呢啲嘢,民主派以為有偈傾,就太過天真爛漫。
做完呢場大政治騷,煲呔可以坐低寫埋佢份處女施政報告,敲定新行會成員。八方聽聞,煲呔本來想飛咗啲對頭人、二五仔、蠢鈍兒同懶惰精,但係阿爺話要和諧穩定壓倒一切,煲呔只好忍住度氣,孭住個包袱多一年半載,到下一屆,呢班前朝遺老肯定冇得玩。
行會加人一早張揚,問題係加幾多個同加邊個。有接近煲呔人士話,人數相信唔會太少,因為咁先可沖淡老懵董嘅殘餘勢力,但係會唔會清一色加入財金人士,就好難講。睇番近日圈內流傳嘅名單,有李業廣、張建東、鄭海泉、范鴻齡以至夏佳理、羅仲榮同李國寶,八方覺得呢張名單好正路,因為香港啱傾嘅俊傑唔多,冇乜得揀。
冇人聽田少支笛
不過,滙豐雖然不只一次酸溜溜話自己冇份入權力核心,但相信鄭海泉今次仍然會名落孫山。寶哥哥話過唔想俾人手指指,話煲呔投桃報李以謝佢出任競選經理;其實做大事不拘小節喎,競選辦公室都出埋,唔通真係捱義氣?至於被卿姐稱為「長江一號」嘅李業廣,冇佢至奇啦,呢個就真係投桃報「李」。
呢個世界,政客或者自命政治家嘅人,講嘢唔使信晒,人望高處,好正常。所以如果大家見到寶哥哥去英國駐港總領事館辦理放棄英籍手續(夏佳理都可能要辦),唔使大驚小怪,因為陳智思當年都係急急跑上花園道放棄美籍,然後就即刻入行會。至於寶哥哥個新鮮出爐嘅爵士銜,就可學曾爵士保留住。
新行會人選,最失望係田少,因為田少一直嘅賣點,係政黨可以幫政府喺立法會拉票,所以政黨應該入行會,點知冇人聽佢支笛。
政黨可以得罪,商界不可得罪,商界之中姓李嘅,更加不可得罪,正如李超人,又如李國寶,前者有銀,後者有人,煲呔為免未來七年惶恐,又點會唔識做。

傳真︰2623-9278
電郵︰[email protected]
empty