曼聯自從喺「丹麥鋼門」舒米高離隊後,一直搵唔到一個穩健嘅龍門,成為佢哋表現嘅絆腳石,好似美國龍門侯活咁,佢上屆加盟後的確表現好出色,但今屆就突然跌watt,由於喺上星期六對保頓嘅聯賽時犯錯,好多人都估佢星期三嘅歐冠盃作客里昂時會正選不保;不過曼聯領隊費格遜喺對里昂賽前話會畀佢繼續打正選。
「老費」果然冇出口術,喺對里昂時侯活仍然係正選,不過就又出事,喺輸畀里昂嘅第一球,就係因為侯活甩手,被里昂嘅克里斯補射入網;而曼聯最後就只係能同里昂打和二比二。
侯活表現失失慌,喺下星期一曼聯大戰利物浦的英超聯賽之中,唔知「老費」重會唔會保佢,畀佢踢正選呢?雖然曼聯到時有後衞李奧費迪南復出,但李奧停咗賽成八個月,能唔能夠適應比賽節奏重未知,如果老費唔搞掂龍門嘅問題,都幾擇使。
紅魔唔使讓波有玄機捧場客靠雲佬打救
里昂前晚主場對曼聯,領先兩球最後都俾紅魔追和。我求大俠開賽前一直都有留意呢場比賽賠率走勢,皆因曼聯唔使讓波真係少有,結果開賽前曾經落飛落到曼聯高水情況下,先有人捧場。估唔到上半場經已輸兩粒,如果唔係雲佬幫手,真係又一次令紅魔捧場客損手。
直播波畫面頻頻中斷球迷捱更抵夜好無癮
前晚對於睇「絲帶台」直播嘅球迷,就衞星訊號問題,兩場波都多次出現畫面中斷。我求大俠就睇皇馬場直播到下半場,轉頭有番畫面就經已皇馬輸到兩球,雖然有慢鏡重播,但都好無癮。咁多年來直播波有問題唔出奇,希望遲啲冬令時間唔好再有呢種情況,話晒半夜捱眼瞓睇波好辛苦!