拍拖遊東龍洲水映長虹送給你
新相識,漫步郊野外,首選東龍洲。
Erica撒嬌:「東龍洲得個古堡,重有乜啫?」說得對,除了到古堡炮台發思古之幽情、往露營場地燒烤放風箏、奔上山崗觀浪這些大路的指定節目外,東龍洲還有甚麼?Dennis故作神秘:「重有乜?有彩虹囉,我送條彩虹畀你。」說的,是較少人知的噴泉岩。
記者:陳漢榮 攝影:陳智良
模特兒:Erica、Dennis(SunSpot)
逢星期一至日出版
鹿頸山和你吹吹風
秋,未算高,氣,亦未算爽,豔陽,依然似火。
行不過一陣子,Erica已香汗淋漓:「又話送條彩虹畀我?家陣去邊?」Dennis拖着伊人手,充嚮導:「咪心急,帶你睇石刻先。」「點解要睇?」「因為我想和你吹吹風。」吹風,當然要上山,碼頭出發右往鹿頸山觀景台,步程20分鐘,這裏不是東龍洲最高點,但向海、開揚,左觀藍塘海峽,右觀大廟灣,眼力好的話,遠眺可及對岸西貢清水灣半島的天后廟,在此吹風一流。
「好難行喎。」Erica面對崎嶇山路,心怯,Dennis安撫:「我拖住你,唔使驚。」觀景台側通往石刻的小路確實難行,兼要落斜,但未至於無路可行,「個石刻好出名㗎,有朵叫『石壁畫龍』,史書都有記載,唔睇嘥料。」Dennis說的,是1819年王崇熙的《新安縣志》,是研究香港早期歷史的重要資料,現列為法定古迹,石刻面有玻璃保護。
營地過夜睇日出
折返碼頭,向左走,上營地,步程30分鐘。
Dennis指着面前一大片青草地,奸笑:「不如今晚我哋玩露營,喺荒島過番晚,浪漫,真真浪漫……好唔好啫?」Erica甩開他的手,輕嗔:「好你個死人頭,餓呀,快啲起爐燒嘢食啦。」東龍洲是露營勝地,無他,環境空曠清潔,方便搭營,兼配套設施充足,涼亭、休憩處、臨時洗手間、燒烤爐一應俱全,還有一點是:向東,看日出一流。
2隻雞翼加3條腸仔,Erica已喊飽:「過夜就無謂嘞,陪你放紙鳶就無所謂。」營地另一優點是地勢夠高又平坦,是放風箏好地點。
炮堡爛地盤有寶
離營地,上山崗,只5分鐘,就是東龍炮堡所在。
Erica面對如廢墟般的東龍炮堡,眉頭一蹩:「嘩!乜鬼炮台呀,搵支炮都無嘅?似爛地盤多啲喎。」情況,確實似爛地盤,但這裏的一磚一瓦,一木一石,皆是珍貴的歷史古迹,Dennis識貨,解釋:「乜爛地盤呀,以前東龍洲係軍事要塞,古堡幾支炮對正佛堂門海峽,專打海賊㗎……想當年烽火連天,戰況何其慘烈……」「咪再吹水嘞,我識字,自己曉睇!」Erica自顧步入炮台側的小型展覽館,內裏圖文並茂,詳盡介紹東龍炮堡和東龍洲的歷史文化。
這長方形的炮堡,在清康熙年間建造,至少有200年歷史,雖已成頹垣敗瓦,但內裏架構井然有序,同樣被列為法定古迹。
噴泉岩手腳並用看彩虹
別炮堡,再上是山頂,懸崖峭壁,看似無路可行。
「嗱,跟住落噴泉岩,係時候等我送條彩虹畀你嘞。」山頂上,Dennis拖着Erica的手,小心翼翼,帶着她沿右邊山「路」而行;未幾,Erica發覺不妥:「你係路唔係路呀,呢條邊係路嚟㗎?」是路不是路?可以答你,這不算是路,因全程是光禿禿的臨海亂石,或攀爬、或跳躍、或挨身而過、或俯伏而行,總之要手腳並用,考身手考膽識,危險,是危險了點,但正如Dennis一句:「路,係人行出嚟嘅。」行不行,由你。
熬得過這10分鐘,噴泉岩就在眼前,哪裏是噴泉岩?易找,是近海邊一塊平整巨石,怒濤衝激下濺起的浪花,在日落斜陽映照下,長虹乍現,Erica讚歎:「好靚!」Dennis亦讚歎:「好靚,你同彩虹一樣咁靚。」「收皮啦你!」「……」
交通
油塘三家村碼頭乘船直達東龍洲
票價:每位$25(包來回)
查詢:珊瑚海(25131103)
西灣河避風塘亦有船往東龍洲
票價:每位$28(包來回)
查詢:林記街渡(25609929)
(往東龍洲的船均只在星期日及公眾假期開行,船程約半小時。)
歎番杯 食餐飽
李大媽涼茶
「我阿媽?搵我阿媽做乜?」回程路上,Erica累得彷彿耳朵也出問題,Dennis笑了笑:「我話搵李大媽,歎番杯Drink。」荒山野嶺,Drink甚麼?說的是營地入口處的假日士多,老闆娘李大媽,用石灶木炭煲出來的酸梅湯、五花茶(各$10),美味得絕對可以用這四字形容——生津止喝。
英姐正菜
終於行回碼頭,女的又喊餓,難得男的又有好推介——郊外油菜($10)是也,碼頭旁的海生士多,話事人叫英姐,喜歡自種自吃菜心、冬瓜、絲瓜,多出的,就拿出來賣,Dennis問口感,Erica這樣答:「餐蛋麵配新鮮菜心,從未如此好食過……」