當晚俞琤喺台上頒發「我最喜愛組合」同男、女歌手三個大獎時，大演口水騷，佢話梅艷芳早年曾經喺賽前問佢賽果，但自己話真係唔知道，又話真係好想劉德華攞獎，總之成晚不停重申賽果公平同公正，甚至以自己屋企人名義嚟發誓，結果當佢講到張學友嗰陣，有人忍唔住大嗌「收皮」，唔單止在場觀眾聽到，而且「收皮」呢兩個字仲因為直播關係而出埋街㖭。
雖然事後商台聲稱係現場觀眾惡作劇，但根據聲帶所發出嘅聲音，絕對似係商台自己人所為，由於當晚商台DJ陳嘉熙留守控制室，令佢一度成為「收皮事件」嘅嫌疑人物。不過陳嘉熙今時今日仲喺商台做幕後要職，睇怕當年講收皮嘅應該係另有其人。
本欄逢周一至周六刊出