高級公務員「吹水大會」噚日最後一日，唔好誤會，八方咁講冇貶意，吹水唔一定係壞事，吹完最緊要做。眾人契媽李麗娟噚日下午趕尾班車參與討論，一完場就忍唔住周圍問同儕覺得點，原來佢話自己最鍾意做市場調查，聽到大家都覺得幾好就開心。
講講吓，有記者突然問契媽係咪有新男友。契媽措手不及，好尷尬咁答：「呢啲嘢原本唔應該公開講，但……冇啦。多謝關心！」跟住就轉話題，一輪嘴咁話係同林D8、稅局局長劉麥懿明、鄔滿海等高官同組，大家爭住發表意見，搞到主持要截停佢哋。媽打話以往最少見稅局局長劉麥懿明，「你知啦，淨係交稅俾佢，好少機會傾偈。」
八方知道朝早教統局局長李國章都有到，重係同成班教署教統局同事同組，聽講安排座位時每場都有HeadTable，即係最高級嘅小組，唔知係咪要令主要官員同普遍公務員分開，以免大家都唔能夠暢所欲言？八方重聽聞李局長嗰組好奇特，成場企到尾。


傳真︰2623-9278
電郵︰[email protected]