香港人食西餐，都鍾意食意粉，不過食嚟食去都係得嗰幾款，有時都會覺得悶。大角嘴最近新開咗間金船長，店內意粉由麵條、醬汁至配料，都可以任揀，好似食緊車仔揦渣麵咁，就算日日唔同餸都可以食成個月，啱晒愛創意兼怕悶嘅香港人喇！

記者：林佩婷　
攝影：陳偉強

車仔意粉40款料任揀

話明主打車仔意粉，選擇材料超過40款，如三文魚、墨魚仔及多款芝士都有。反而最吸引的是汁類，大廚Joseph特別設計泰式醬汁如泰式紅咖喱汁及青咖喱汁。在眾多醬汁中，Joseph就推介意式香草醬，醬汁所用的紫蘇葉從意大利訂回來，味道比其他餐廳的更強烈！咁多選擇，真係睇到眼花，不如就等Joseph推介兩款絕佳車仔意粉配搭喇！$35包意粉、汁及調味；材料$5-$8/款

大廚推介至正配搭
青紅甜椒＋煙鴨胸＋青咖喱汁＋天使麵$50

這個可以說是泰西式合併，咖喱通常用來配燒鴨，但用鴨胸代替燒鴨，更能調和兩者的味道，食落更香，而青紅椒能增加整個菜的口感。

海鮮＋番茄醬＋墨汁麵$67

師傅選用新鮮由意大利入口的羅馬茄加紫蘇葉製成的番茄醬，配上八爪魚、魷魚、中蝦及青口，墨汁麵味道強烈，跟番茄醬互相配合，可說是非常傳統的選擇。

Joseph推介的意式香草醬，紫蘇葉從意大利入口，味道濃烈。

漢堡扒生熟度自己話事

無論快餐店還是高級餐廳，漢堡扒看來都是普通菜式。這裏的漢堡被喻為鎮店之寶，漢堡扒由肉眼、西冷、牛冧肉，再加上香草及洋葱調校而成，就連麵包都千挑萬選特定供應商。配上車打芝士、甜酸青瓜，味道啱啱好。

創新薄餅

潮流興Fusion，不單止普通菜式可以玩Fusion，就連薄餅都得。這裏除有傳統款式外，大廚久不久會加入自己的創意，大家有無諗過用中式燒鴨做薄餅？以下2款薄餅就是大廚的創意新品。

馬卡風芝士薄餅配黑松露菌油$78

好多女仔為怕肥唔食Pizza，這個素薄餅應該啱晒佢哋。馬卡風芝士出名香軟，黑松露夠香，再用巴麻臣芝士灑面，口感更脆。這個Pizza特別在於將餅皮一開二，中間塗上馬卡風芝士再焗，食落好似三文治，中間軟熟但外表脆口。

中式燒鴨薄餅$65

傳統意大利薄餅皮加上中式燒鴨，醬汁則選用中式海鮮醬及西式番茄汁，味道甜甜酸酸。而芝士則混合柔軟的莫莎莉亞芝士、味道強的巴麻臣芝士及有濃烈香味的車打芝士，充份食出芝士口感同鹹味。最後，灑上京葱，食落真係以為自己食緊北京填鴨。

食客有意見

自家做大廚

Joseph特地教大家於家中自煮西餐，意大利飯口感豐富，薑汁梳乎厘味道吸引。兩道菜的煮法簡單，大家可以喺屋企整，喺老公仔囡面前威吓！

海鮮意大利飯

需時：40分鐘
價錢：$50/1人

材料：意大利米450克、牛油110克、洋葱100克（切片）、蒜頭3瓣、白葡萄酒30毫升、半殼青口/墨魚仔/中蝦/龍脷柳粒/帶子各2隻、巴馬臣芝士40克（磨碎）、上湯1公升、忌廉30毫升、芝士/鹽/胡椒/橄欖油各少許。

做法：

燒熱橄欖油，炒香洋葱後加意大利米大火炒約5至10分鐘，再落白酒炒5分鐘至酒亁，倒入上湯不停攪煮約20分鐘至剩2成湯，加入忌廉/芝士/蒜頭/鹽/胡椒/已用牛油煎香的海鮮，煮多2分鐘便成。

薑汁梳乎厘

需時：30分鐘
價錢：$12/1人

材料：蛋白2隻、糖15克、薑茸連汁5克、牛油少許

吉士汁：吉士粉3.8克、水9.5毫升、蛋黃1隻、淡奶6.8毫升（全部攪勻）

做法：

先於梳乎厘器皿上塗層薄牛油，用打蛋器攪勻蛋白/糖至棉花狀。之後加入薑茸汁/吉士汁，用膠刮攪勻。倒入器皿後，放入焗爐焗16分30秒便成。

貼士：記得先預熱焗爐至180℃約10至15分鐘。

金船長（23817369）
地址：九龍大角嘴道大全街55號3A
時間：11am-11pm　
交通：地鐵奧運站B出口