一名小童日前在天水圍示威活動中掟水樽，成為全城焦點，有人質疑錯在小朋友，還是今時今日的港爸港媽？今日又有網民上載多張照片，顯示有4名小童在西沙公路附近石灘，撿起岸邊的海星，再飛掟入海，一名成年女子站在旁邊但無阻止，反而忙於替小朋友拍照，引來大批網民批評，質疑小朋友行為是「殘酷對待動物」，怒斥「無家教」。

上載照片的網民稱，照片是其朋友日前所拍，「經過觀察當時人認定佢哋唔係救海星，而係殺害緊佢哋先出聲，但勸阻無效，想post出來警醒大家唔好咁做」。

生態教育及資源中心總監程詩灝表示，海星生命力頑強，即使在海中遇襲都可以「斷臂求生」，相信小朋友將海星拋入海不會對海星造是損傷，但事件反映小朋友對尊重生命的心態有問題，「你都唔會咁拋貓貓狗狗，點解又要咁對海星呢?」

程詩灝表示，市民如果想將岸邊的海星放回海中，應輕輕用手捧起海星放入深水區。但正常情況下，市民其實不用刻意「解救」海星，「海星有能力喺退潮時，將自己塞入濕潤的泥沙裏面保命，根本唔使人幫。」他稱，雖然殘酷對待動物罪未必適用於海洋生物，但如果市民是在海岸公園範圍檢走或不人道對待海洋生物，則有機會觸犯《海岸公園條例》。