慈樂邨居民投訴稱,樂信樓互助委員會經常於門前兜售鋼閘生意,並有人在會所門前作示範和推廣。其中一居民程先生稱,「我之前重見過兜售晾衫架㖭呀。嗰度係互委會會址,應該係用嚟辦理會務或搞居民活動,唔應該用嚟做生意囉。」
兼作九龍街坊會
另一居民則表示,發現本為互委會會址的地方,又同時兼為「九龍街坊會」辦事處,令人費解。
「嗰度明明係互委會會址,但不時又見有第二個會獨立活動喎。咁即係點呀?一物二用?」
本報跟進投訴,前往樂信樓互助委員會視察,見樂信樓互助委員會會址門前擺放一道鐵閘。記者入內向職員查問,一名身材肥胖女子向記者表示,鐵閘乃按邨內閘門尺寸設計,只要花二十元加入九龍街坊會成為會員後,便可以會員優惠價二千六百元購買原來價值三千元的鐵閘。
入會後購物九折
當記者問:「係咪喺呢度入會?」對方答:「係呀,喺呢度畀錢,加入做九龍街坊會會員。你入會後就可以買呢道閘㗎喇。」
記者亦發現,樂信樓互助委員會門外牆壁告示板上,張貼有九龍街坊會招收會員海報,門框上亦懸掛宣傳九龍街坊會為居民或街坊爭取權益的宣傳橫額。
本報曾聯絡慈樂邨樂信樓互助委員會主席,但直至截稿日仍未收到任何回應。