台灣綜藝天后徐熙娣（小S）喺94年同家姐徐熙媛（大S）以組合ASOS加入娛樂圈，雖然佢今年只係得40歲，年紀輕輕已經喺娛樂圈打混多年，喺鏡頭前經常見到佢大膽敢言嘅一面，不過早前佢為台灣《蘋果》拍攝15周年微電影，今次飾演「老S」──初期阿茲海默氏症患者（舊稱老人痴呆），一句話總結出道至今嘅心情：「身為藝人，我每天都活在否定自己的恐懼中。」

經常語不驚人誓不休嘅小S，曾經喺訪問提過自己唔係好留戀舞台：「我甘於平淡，不怕退休，也不怕被遺忘，倒是怕自己遺忘親愛的家人。」於是當日知將會喺微電影飾演初期阿茲海默氏症患者，小S以「老娘跟你拚了」嘅氣勢，好爽快應承。當日同《蘋果》劇組討論劇本嘅時候，小S突然好嚴肅咁話：「其實我每天都在否定自己，怎麼越來越肥啊，主持得是不是很爛啊。我全身上下都是弱點，『當明星』這件事，就是一直處在恐懼當中。」

向來都嗜好杯中物嘅小S，喺片場聽到有紅酒，即刻雙眼放光叫人攞俾佢飲，結果喺酒精嘅催谷下，有幾場戲小S嘅眼淚收放自如，佢仲話：「怎麼都沒有人再找我演戲，你們會幫這片報獎吧？」帶著三分醉意嘅小S，喺訪問仲侃侃而談自己嘅心路歷程：「小時候我吹蠟燭被燙到鼻子，所以超怕蠟燭。有一次家裡停電，我就不敢吹熄浴室的蠟燭，最後竟然釀成火災，連消防隊都來了。從此之後我知道逃避恐懼並不能解決問題，反而會製造更大的麻煩。」

寶貝女兒都唔會嫌佢醜、嫌佢肥同嫌佢老，相對於其他人嘅閒言閒語，又點會有恐懼？小S坦言話，為所嘅愛人勇敢，就係呢個世界上最無懼嘅力量。

影片提供：台灣蘋果日報

精選娛聞，喺晒《娛果》
http://fb.com/appledailyent