幾時開始有波睇?時為1970年,當年巴西如何狂風掃落葉收服意大利,原來公仔箱已經有得睇,不過就只是錄播的,但只是遲了3日而已,球迷們都視為一大突破,而大部份香港家庭,還只是在看黑白電視,他們看到決賽中的巴西,球衣是白色的。
幾時開始有直播?時為1974年,大家當然難以想像當年人造衞星那個標誌對觀眾震撼有多大,我也不敢肯定,但應該比現在你手機收到wifi訊號時更興奮,而那時家裏擁有一部彩色電視的話,其威水程度也應該遠勝今時今日訂到一部iPad。
又幾時有得睇晒整屆世界盃?不用等得太耐,82年達成你願望,當屆共有24支球隊共52場賽事,由78年4場直播到突然全部睇晒,可想而知球迷們的興奮度可以有多高。
喂!舊陣時成個月可能只得一兩場英格蘭足總盃和本地波睇,突然之間一絲不掛的給你睇晒,血氣方剛的球迷們,能不血脈沸騰嗎?到今時今日,日日奉旨有波睇的見慣不怪,當然是兩回事。