由朴海鎮、金高恩、徐康俊等主演嘅tvN新劇《奶酪陷阱》,現時喺韓國好受歡迎,除咗男女主角朴海鎮同金高恩人氣急升外,男二徐康俊亦都人氣火爆,佢仲受到各地邀請,邀請佢到當地舉行粉絲見面會,可見現時徐康俊嘅吸金能力好勁。
早前徐康俊已落實會去新加坡Suntec國際會展中心舉行粉絲見面會,話口未完,原來徐康俊又受到泰國方面嘅邀請,佢將於大後日(21號)喺泰國曼谷舉行個人粉絲見面會「SEOKANGJUNFANMEETINGINTHAILAND」,據知當日徐康俊會舉行記者會,之後就接受當地傳媒嘅採訪,再通過粉絲見面會同當地嘅粉絲們見面。
粉絲見面會將於曼谷嘅SCALATHEATRE舉行,徐康俊將通過多樣化嘅遊戲同活動與粉絲作近距離接觸,雖然徐康俊近來工作繁忙,但到時仍會帶來精彩表演,為粉絲演奏鋼琴,又會大開金口唱歌仔。
今次係徐康俊繼去年2月之後,再次喺泰國舉行粉絲見面會,除咗泰國同新加坡外,徐康俊仲收到嚟自內地、日本等亞洲其他國家嘅活動邀請。