韓國女團Lovelyz聽日喺九展舉辦粉絲見面會，係組合首次喺香港開騷，成員今日率先來港出席記者會造勢，吸引近300粉絲撐場。

Lovelyz身穿白色連身裙晒腿現身，甫亮相就用廣東話「大家好，我哋係Lovelyz」向粉絲打招呼，粉絲立即咆哮、尖叫歡迎。叡仁表示小時候曾孖父母來港旅行，其他成員就係第一次訪港，並表示：「覺得香港粉絲好熱情、親切，因為係首次咁近距離見粉絲，覺得好感動、好開心。」

Lovelyz表示來港想去睇夜景、購物，粉絲亦送咗蛋撻畀佢哋食，亦想試雲吞麵及熊仔曲奇。Lovelyz又表示聽日港騷會唱新歌，令粉絲大表期待。隨後有4位粉絲上台跳歌曲《Now, We》，成員大讚「跳得好，好可愛」。

被問到會唔會想挑戰演戲，成員美珠表示想拍港產片演公主，佢又稱想同謝霆鋒合作，智秀就話想拍恐怖片。剛於4號踏入20歲生日嘅成員叡仁，稱當日與成員一齊度過，覺得好幸福，全場粉絲更大合唱韓文生日歌，叡仁即以廣東話「多謝」謝粉絲兼派心，之後Lovelyz又落台與粉絲大合照。

更多韓流，喺晒《娛果》
http://fb.com/appledailyent