早排小藍同AVConsultant影音女顧問瑩瑩傾開偈，佢話今時今日玩影音再唔係男士嘅專利，𠵱家唔少女性都鍾意喺屋企添置家庭影院，以佢哋公司嘅客為例，男女顧客比例係7：3。事實上，好多中產男女對AV嘅要求真係好唔同嘅，佢公司同啲Couple設計家庭影院，除咗介紹產品符合顧客要求，仲要幫吓口令一齊嚟嘅男女顧客達成共識。
瑩瑩話，女仔對眼會比男性敏感得多，對畫面要求特別高，畫面有少少noise，或者光咗都睇得一清二楚，買電視都要買一線品牌，買投影機會買講緊6萬元以上嘅高階DLP投影機，而唔係一般兩三萬嘅入門級LCD投影機，「好似鄧萃雯都玩咗投影好多年，都係用DLP投影機。」

女顧客專買靚嘢

佢特別提醒人哋啲老公，佢哋選擇電視、投影幕，唔理距離幾近，都要越大越好，但係畫面太大，女仔睇會有好大壓迫感，「有啲女仔嚴重到睇幾分鐘就會好頭暈，睇啲移動嘅影像仲會睇到嘔。」
女性對AV嘅5.1環迴聲道要求較低，對兩聲道要求反而高啲，鍾意啲聲音細緻啲暖啲；男仔對聲音要求好高，要嘭嘭聲，要夠分析力，仲要加埋重Bass。男女花費都好唔同，瑩瑩話，女仔一係唔買，一買要買靚嘢，可以用耐啲，一套家庭影音平均消費約20萬元；男仔因為好花心，平均消費10萬元，平啲可以成日換機。
逢周五刊出