梁詠琪今晚以deep v造型出席時裝騷活動，雖然霎眼望落有啲性感，但係原來佢中間做咗啲手腳，專登加了一層薄紗，Gigi笑笑口話：「夠㗎喇，本身係有一層好薄好透嘅紗，但係有等於冇，我覺得唔可以，太低喇，低到落腰，行唔到出嚟，所以我咪要求加3層紗，o依家睇落比較適合。」

Gigi仲話：「如果太性感嘅話，我唔覺得唔係舒服，成日都要就住就住，都係要安全至上。」唔知性感打扮，又使唔使老公批准呢？佢話：「唔使，呢件衫都唔係好性感啫，佢對我嘅著衫尺度都冇乜限制，最緊要有美感，平時我喺屋企都好似時裝騷咁，試勻晒俾大家投票，不過我個女好易估，鍾意我著裙同埋綠色嘅嘢。」

咁囡囡又有冇唔俾佢性感打扮？Gigi笑笑口話：「我有時著背心，條吊帶跌咗落嚟，佢都會叫我拉番上去，唔忍心我咁性感！我仲試過沖完涼著住一件長身啲嘅衫，佢都會問我點解唔著衭，提我要著番衭，因為婆婆話唔可以露出個膝頭哥，所以阿囡對我著衫一直都好嚴謹。 」

精選娛聞，喺晒《娛果》
http://fb.com/appledailyent