【李八方online】民建聯研究稱香港為「國家」 網民:原來係愛香港國
民建聯愛國
民建聯「香港青年創業意向研究結果」報告書入面,竟然出現「香港是一個市場經濟發達的國家」嘅字眼。
過去經常公開炮轟港獨言論嘅民建聯,今日喺黨總部搞咗個「香港青年創業意向研究結果」發佈會,話會將個研究結果交畀身兼青年發展委員會主席嘅政務司司長張建宗,該黨立法會議員周浩鼎、青年民建聯主席顏汶羽、副主席招文亮同秘書長蕭煒忠都有參與。本來呢個調查無乜特別,但有眼利網民發現,民建聯竟然喺個報告暗推「港獨」,仲公開呼籲《大公》、《文匯》要盡快加入批鬥!
事緣青年民建聯嘅「香港青年創業意向研究結果」,談及點樣提升金融產品對初創企業嘅支持時,竟然有以下兩句:「香港是一個市場經濟發達的國家,更有條件利用金融工具幫助青年進行創業。」
向來標榜愛國的民建聯,竟然稱呼香港做「國家」,有網民睇到即時喺網上分享兼留言:「民建聯成日講愛國愛港,原來係指愛香港國呀!激進過掟磚咪呢啲囉,直頭分裂咗國家喎。」佢哋仲搞笑問「青年民建聯」係咪不代表民建聯,又話等睇民建聯將會鬼崇刪走呢個寫法。
青年民建聯發表上述「港獨」論述幾個小時後,八方就發現,一如網民所料,民建聯已經低調將香港改稱返做「城巿」,唔知一向鍾意根據個別網上紀錄剝奪市民參選資格嘅選舉主任,嚟緊會唔會DQ民建聯嘅參選人呢?