陶君行批評特首曾蔭權對投票與否支吾以對，樹立壞公民榜樣，完全不能為香港巿民接受，亦令人質疑選舉公正。
辭職立法會議員黃毓民指，民主派過去20年來爭取民主毫無寸進，「舊嘅方法已經行唔通，我哋另闢蹊徑，用一個新嘅辦法，而呢個辦法係取決於人民。」他說：「我哋從來無標榜個人，你睇我哋啲文宣就知，為咗今次選舉，我哋幾個使咁多錢，個黨使咁多錢，係咗乜呢？」
黃續指，如果有逾100萬人投票，或公社兩黨五個候選人得票，與當年民主派得票不相伯仲，是極大震撼，「無論你點解讀，政府都要向呢70萬、80萬人去解釋，呢個係人民意志通過一個投票箱嘅表達。」現時全港選民約330萬，投票率達三成，即需要近100萬人投票。
2000年港島區補選，建制派與民主派對決，投票率逾30%，「嗰次係余若薇對鍾樹根，另一次兩太（指陳方安生與葉劉淑儀）對決，因為嗰次兩邊都係超級動員，先有50%超高投票率，今次無咗建制派參與，即係話如果投票率去到三成，所有支持民主派嘅票出晒嚟，已經係大勝o架喇。」
另一辭職議員長毛梁國雄解釋，今次變相公投不能套用法理公投標準，「邊個人話用法理公投嘅標準嚟衡量呢次公投，唔係無知就係無恥，你聽過一次法理公投係可以被打壓嘅未呢？你聽過台灣公投，有人大聲出嚟話公投唔應該未吖？」